Mga mag-uuma nakadawat og ayuda gikan sa DOLE

CEBU, Philippines — Niabot ngadto sa 28 ka mag-uuma og seaweeds sa Barangay Gilutongan, Lungsod sa Cordova nga sakop sa Gilutongan Seaweeds Farmers Association (GSFA) ang makabenepisyo sa P960,000 nga livelihood assistance nga gihatag sa Department of Labor and Employment Region (DOLE)-7.

Si DOLE-7 Director Lilia Estillore uban kang Bise Mayor Tago III kinsa maoy nipresentar kang Cordova Mayor Cesar Suan ang nitunol sa tseke ngadto sa beneficiaries.

Gipanglantawan nga maghatag kini og oportunidad sa beneficiaries nga mag-venture sa Boat for Island Hopping project.

Ang beneficiaries nakadawat kini og kahimanan nga gikinahanglan alang sa ilang livelihood project sama sa pump boat; engine-4DR5 nga adunay transmission nga 80 HP; battery life- 16 plates; solar panel (battery charging); propeller Line 1 leng # 1.5; steering wheel set; anchor; ug canopy.

Sama sa ubang organisado nga beneficiaries sa tabang sa panginabuhian sa DOLE ang GSFA adunay gitudlo usab nga project management team nga nagtuman sa mga tahas ug responsibilidad sa nagdumala sa negosyo, marketing, ug finance.

Ang tabang panginabuhian naggikan sa DOLE Integrated Livelihood and Emergency Employment Program (DILEEP) diin ubos niini ang usa ka component nga Kabuhayan Formation nga makapahimo sa beneficiaries sa programa nga makasugod og indibidwal o grupo nga livelihood undertaking.

Ang beneficiaries nalakip sa group personal accident insurance (GPAI) sulod sa usa ka tuig pinaagi sa GSIS.

Sa laing bahin, gihangop sa 1,344 ka molupyo sa 11 ka barangay sa Isla sa Olango,  Siyudad sa Lapu-Lapu nga nakadawat og pinansiyal  nga ayuda gikan sa Department of Labor  and Employment- 7.

Ang hinabang nga pinansiyal ubos sa programa sa DOLE nga Tulong Pangkabuhayan sa Ating Disadvantaged/Displaced Workers (TUPAD) nga gipaagi sa opisina ni Lapu-Lapu City Lone District Representative, Ma. Cynthia Chan. Sa mainland sa Olango 994 ang nakadawat nga beneficiaries sa TUPAD, 150 sa Barangay Pangan-an, tag 100 sa Caohagan ug Caubian.

Nikabat ngadto sa P6.3 milyones ang kinatibuk-ang gahin alang sa kapin 1,000 ka beneficiaries sa mga isla sa Siyudad sa Lapu-Lapu diin ang pundo gikan sa DOLE. (BANAT NEWS)