CEBU, Philippines — Usa ka trisikad driver gidakop human gireklamo nga nangumot og dughan sa usa ka 16 anyos nga estudyante sa Sitio Laguna, Barangay Bulacao, dakbayan sa Sugbo. Apan sigon pa sa suspetsado nga si alyas Geo, 42 anyos, trisikad driver ug residente sa nahisgutang lugar nga hubog siya ug wala masayod nga nangumot siya og dughan sa 16-anyos nga estudyante nga silingan ra niya.
Ang nahinunduman lang matod pa niya nga nagtagay sila sa iyang mga higala gikan udto hantod na sa alas 3 sa hapon. Human ninii nipauli siya sa ilang panimalay ug natulog. Giingong gipukaw siya sa iyahang asawa kay naay mga tanod nga nangita kay gihilabtan matod pa niya ang bata pinaagi sa pagkumot sa dughan niini.
Wala siya masayod sa pasangil sanglit hubog siya apan nangayo siya og pasaylo ug nanghinaot nga mapasaylo sa biktima ug sa mga ginikanan niini. Gikaguol niya ang hitabo ilabi na nga duna siya'y gamay'ng bata.
Ang asawa sa suspek mihulagway sa iyang bana nga dili bayolente ug kasamtangan kining nagpaalim gikan sa depresyon. Gitug-an niini bag-ohay lang nakagawas sa psychiatric ward sa Vicente Sotto Memorial Medical Center ang bana.
Nagkanayon sab kini nga dunay naka video nga nag-inom iyang bana uban sa mga higala.
Nasayran ang 16-snyos nga tinun-an nahikapan ang dughan gumikan sa pagsayaw-sayaw sa suspek. "Kana gud siya kun maka-inom magsige ra nag sayaw...Suhito mga silingan nga magtambling-tambling pa sa trisikad," sigon pa sa asawa nga nahinabi sa DYSS Super Radyo Cebu.
Nangayo kini og pasaylo sa ginikanan sa biktima ug nanghinaot nga dili na pasakaag kaso iyang bana. (BANAT NEWS)