CEBU, Philippines — Aduna himoong security adjustment ang Police Regional Office gumikan sa nahitabong tulis sa duha ka pawnshops sa F. Calderon Street, Barangay Ermita, siyudad sa Sugbo.
Suma pa ni Police Lieutenant Colonel Gerard Ace Pelare, tigpamaba ni PRO-7 nga nihimo sab sila og dayalogo sa tanang miyembro sa business community sama sa mga bangko, jewelry shop ug ubang patigayon.
Dunay himoong assessment sa matag balay patigayon, tan-awon sa kapolisan kun unsay pwede nila masugyot aron malikayan nga mabiktima sa mga tulisan ug uban pang mga kriminal.
Tapukon sa kapolisan ang mga pawnshops, jewelry stores, money remittance centers ug ubang establisamento ug mahimong regular na ang mga dayalogo nga pagahimoon.
“This is a very important adjustment kining we will make sure nga organisado ang atong mga miyembro sa business sector kay posible nga ang information nga makuha sa usa ka business establishment can be of use to the rest of the members of the business sector”, ni Pelare pa.
Samtang gidayeg ni PRO-7 Regional Director Brigadier General Anthony Aberin ang Special Investigation Task Group(SITG) sa kalambuan sa ilang imbestigasyon.
Si acting Cebu City Mayor Raymond Alvin Garcia mangayo ug rekomendasyon sa kapolisan aron dili na masubli ang susamang insidente sa pagpanulis.
Pakigtagboan nila ang mga nanag-iya ug patigayon aron hisgutan ang pagpahugot usab sa ilang seguridad.
Tinguha sa acting mayor nga pahugtan pa sa kapolisan ang ilang pagbantay ug monitoring sa siyudad sa Sugbo ug giawhag usab ang katawhan nga motabang sa pagtaho kun aduna silay nabantayan nga mga kadudahan og lihok sa ilang dapit. (BANAT NEWS)