Executive session gihimo bahin sa pagtrabaho sa CCMC

CEBU, Philippines — Mitumaw ang mga pangutana kalabot sa Cebu City Medical Center (CCMC) construction human gisusi ang kahimtang niini sa konseho sa dakbayan atol sa executive session nga gipahigayon aron mahatagan og katin-awan ang kalangay sa pagtukod niini.

Nahimo ang executive session nunot sa resolusyon ni Konsehal Nestor Archival Sr nga naggumikan sa privilege speech ni Konsehal Mary Ann de los Santos human sa deklarasyon ni acting Mayor Raymond Alvin Garcia nga i-rebid ang katukoran sa CCMC.

Atol sa sesyon, mitumaw ang nagkalahi nga mga pamahayag ilabi na sa katin-awan kon aduna bay nagpadayon nga civil work para sa CCMC.

Kini human niingon si Engineer Robert Varquez, Project Director sa pagkompleto sa CCMC nga walay pisikal nga trabaho karon sa CCMC kondili preparatory works lang aron mahuman ang kataposang tulo ka floors.

“Actually, there are no physical activities ongoing as far as the building is concerned but preparatory work is already in place like the placing of the tower crane,” matod ni Varquez.

Giklaro usab niya nga bisan sa wala pa ang privilege speech ni de los Santos, si Varquez niingon nga walay nagpadayong trabaho alang sa 8th, 9th, ug 10th floors. Dugang pa ni de los Santos nga kini tungod kay na-terminate na ang kontrata sa kanhi kontraktor nga M.E. Sicat Construction Inc., /AVECs Corporation.

Si Konsehal Jerry Guardo, Chairman sa Committee on Infrastructure niingon nga ang termination usa ka mutual agreement tali sa M.E. Sicat ug karon preventively suspend City Administraror nga si Atty. Collin Rosell diin dunay wala magamit nga pundo nga P700 milyones.

Gitataw niya nga ang nagtukmod nila sa pagpatawag og session mao ang ilang naobserbahan nga adunay civil works sa CCMC karon ug nag kwestyon kun kini dunay kontrata o bidding alang sa maong mga trabaho.

Matud ni Varquez nga ang nagpadayon karon mao ang pagtukod sa Operation Smile nga mag-okupar sa 7th floor.

Apan si Acting Cebu City Engineer Lowelle Corminal sa Department of Engineering and Public Works (DEWP) niingon nga adunay nagpadayon nga trabaho sa CCMC nga nagtumbok sa Dakay Construction nga maoy kontraktor. (BANAT NEWS)