CEBU, Philippines — Giduso na ngadto sa Committee on Budget and Finance ang gisugyot nga P384 million Supplemental Budget (SB) 2 atol sa regular session sa konseho sa siyudad sa Sugbo kagahapon, Agosto 14, 2024.
Ang official budget proposal sa SB 2 alang sa General Fund ang giduso ngadto sa city council ni Acting Mayor Raymond Alvin Garcia.
Atol sa sesyon, ang legislative body mi refer niini ngadto sa Committee on Budget and Finance nga gipanguluhan ni Councilor Noel Wenceslao.
Sa gihimong breakdown, ang labing daku nga gigahinan sa budget mao ang Department of Public Services (DPS) nga mikabat og kapin sa P145,520,500.
Ang maong kantidad gitagana alang sa Gen. Administration, Street Cleaning, Garbage Collection and Disposal Services, Street Lighting, ingon man sa Artesian Well System.
Kuhaan sa pundo mao ang savings sa siyudad gikan sa Abril ngadto sa Hunyo 2024 ug gawas niini aduna usay pundo gikan sa savings o realignment gikan sa kasamtangan nga gahin ug ang Surplus Adjustments, nga ni-total og P379, 154, 492.
Dihang nahinabi sa mga tigbalita, si Garcia masaligon nga mapasar sa konseho ang SB 2 tungod kay matud pa gikinahanglan ug dinalian kini nga pundo alang sa panginahanglan sa city government.
“I hope it will be passed as soon as possible time kay mao man gyud nay immediate needs sa city government. I hope they can be able to discuss it right away. Have the budget hearing so that they can pass it,” suma ni Garcia.
Kahinumduman niadtong March 8, 2024, dihang naaprobahan ang SB alang sa 2024 sa konseho ug nalakip sa SB1 ang pundo alang sa bonus sa mga City Hall employees uban sa proposed budget sa hosting sa Palarong Pambansa, ug ang transitional housing project. —Gikan sa The Freeman/Rowena D. Capistrano/MEL BANAT NEWS