Pagpost sa social media sa missing person angayan dunay protocol

CEBU, Philippines — Gihangyo ni Talisay City mayor Gerald Anthony “Samsam” Gullas ang Department of Social Welfare and Development (DSWD) ug ang kapolisan sa Talisay nga motuman sa guidelines sa pagpost diha sa social media kalabot sa missing person.

Matud pa ni Gullas nga gusto lang niya nga adunay protocol aron di makamugna og kabalaka sa kadaghanan.

Ang maong reaksyon sa mayor naggumikan sa tahu nga dunay tulo ka mga batan-on nga sunod-sunod nga na missing.

Apan nasuta nga ang maong mga batan-on nikuyog lang sa amigo, ug ang usa nikuyog sa uyab ug duna usab nga nilakaw kay dunay gikaaway sa ilang pamilya.

Ang tulo nga giingon nga missing pulos na nga nakabalik sa ilang tagsa ka pamilya.

Nihangyo sab si Gullas sa katawhan nga di dayon mohimo og konklusyon kay ang otoridad sa Talisay naghimo man sa ilang trabaho aron matabangan ang Talisaynon.

Si Police Lt. Col. Epream Paguyod, hepe sa kapolisan nibutyag nga responsibilidad sa ginikanan ang ilang mga anak.

Busa siya nanghinaot nga ilang himuon ang ilang responsibilidad sa pagmonitor sa kalihukan sa ilang mga anak.

Ang kapolisan igo lang nga niabag sa pamilya sa giingon nga nawagtang ug gipost sa ilang social media aron daghan ang makahibawo og dali nga makit-an. — MEL BANAT NEWS