CEBU, Philippines — Nadakpan sa kapolisan sa Mabolo Police Station sa Cebu City Police Station ang 11 ka tawo nga nagtigbakay diha sa Sitio Upper Carreta, Barangay Carreta, Siyudad sa Sugbo sa niaging adlaw.
Ang mga suspetsado pareho kining hingkod ang panuigon ug mga residente sa mga barangay sa Carreta, Mabolo, Hipodromo ug Dakbayan sa Mandaue.
Matud ni Police Major Romeo Caacoy, Jr., hepe sa Mabolo Police Station nga nakadawat sila og report gikan sa concerned citizen kalabot sa gipahigayong tigbakay diha sa nahisgotang dapit ug dali nila kining gialarmahan.
Nakuha sa mga polis gikan sa mga suspetsado ang mga gamit alang sa tigbakay.
Kasong kalapasan sa Presidential Decree 1602 kun “Illegal Gambling” ang atubangon sa mga suspetsado.(BANAT NEWS)