CEBU, Philippines — Napalgang nagbuy-od nga naligo sa iyang kaugalingong dugo ang usa ka 47 anyos nga lalaki nga biktima sa pagpamusil diha sa Sitio Kadulang sa Barangay Marigondon, Siyudad sa Lapu-Lapu.
Apan ang suspetsado mitahan kini kang Mayor Junard "Ahong" Chan kagahapon sa kaadlawon ug nangangkong “self-defense” ang nahitabo.
Ang mitahan mao si Arnel Quiroy Bintain, silingan sa biktima nga si Ruben Manzano.
Si Police Lieutenant Colonel Christian Torres, tigpamaba sa LCPO miingon nga nakadawat og taho alas 3:30 ang takna sa miaging Huwebes sa kaadlawon labot sa nahitabong pagpamusil sa maong dapit. Sa pagsusi sa kapolisan sa Presinto 4, nagbuy-od na ug wala nay kinabuhi si Manzano tungod sa samad pinusilan.
Base sa nakuhang impormasyon sa mga imbestigador, nagbarog lang ang biktima sa lugar sa dihang kini gikatahong giduol kini sa wala hiilhing lalaki dayong pusil niini.
Gidala unta ang biktima sa Lapu-Lapu City District Hospital apan nakabsan gyud kini sa kinabuhi.
Samtang nagpadayon sa ilang hot pursuit operation ang team sa kapolisan sa Presinto 4 sa LCPO nga gipangulohan sa ilang hepe nga si Police Major Judith Besas, nakadawat si Chan og tawag gikan ni Marigindon Barangay Konsehal Jerom Amores labot sa tinguha nga pagtahan sa suspetsado.
Dali nga giadto ni Chan ang dapit nga nahimutangan sa maong suspetsado ug kasamtangan na kini karong gitanggong sa holding facility sa kapolisan alang sa pagpasaka og kaso.
Padayon pa ang imbestigasyon sa kapolisan kun unsay gikasungian sa duha nga nisangpot kini sa pagpamusil. IBM BANAT NEWS