CEBU, Philippines — Gipangulohan ni Mayor Jonas Cortes ug Bise Mayor Glenn Bercede sa paglusad sa mga gihan-ay nga kalihokan sa ika-55 nga Charter Day Anniversary karong Agosto 30, 2024.
Ang Mandaue City Chamber Of Commerce and Industry (MCCI) nga magsaulog usab sa bulan sa Agosto sa Mandue Business Month 2024 ang naghan-ay usab og mga kalihokan.
Naglakip sa mga kalihokan nga gihatagan og dakong gibug-aton ni Cortes mao ang ground breaking ceremony sa tukoron nga government center diha sa luna nga nahimutangan sa naguba na nga Cebu International Convention Center (CICC).
Sayo pa, ang mga nagpuyo diha sa CICC gibalhin kini ngadto sa mga balay nga gitukod sa gobiyerno diha sa Pasilong Center diin nahimutang usab kini duol sa CICC.
Si Cortes nagkanayon nga human sa himuon nga ground breaking ceremony sugdan dayon ang kaugmaran sa nahisgutang proyekto nga gitinguhang mahuman sulod sa unom ka bulan.
Gipadayag ni Cortes ang kamahinungdanon sa maong proyekto tungod kay pinaagi unya niini mahiusa sa usa na lang ka dapit ang mga buhatan sa gobiyerno nga nagkatag-katag ang nahimutangan karon.
Si Kristian Marc Cabahug, executive director sa MIPTAC sa press conference nga gipahigayon nagkanayon nga naglakip sa mga gihan-ay nilang kalihokan mao ang pagpahigyon og charter month opening parade sa Agosto 12, 2024 nga magsugod sa alas 3:00 sa hapon.
Ang maong kalihokan sundan usab sa Agosto 16, 2024 sa pagahimuon nga Start Up Innovative Summit 2024 diha sa Bai Hotel ug Push Bike Race sa Agosto 17, 2024 diha sa Herritage Plaza ug daghan pa. BDB BANAT NEWS