CEBU, Philippines — Kalambigitan sa illegal nga drugas nga ang usa sa gisubay sa kapulisan Police Station 11 sa Cebu City Police Office(CCPO) nga motibo sa pagpusil patay sa usa ka fratman diha sa Sitio Brahmans Ibabao Proper, Barangay Mambaling, siyudad sa Sugbo kagahapon sa kaadlawon.
Ang biktima mao si Mario Sumilhig, 20 anyos, residente sa naasoy nga lugar ug namaligya og tubig. Samtang ang wala mailhing mamumuno nagsul-ob og black long sleeve ug black shirt ug duna kini backup nga armado sab.
Nagkanayon si Police Major Efren Diaz Jr., hepe sa Police Station 11 nga nagpahigayon sila og hot pursuit operation ug gisusi na ang CCTV footages sa palibot sa lugar pamasin nga makatabang sa ilang imbestigasyon.
Sa pangutana kun may kalambigitan sa frat wars ang hitabo sanglit miyembro man kini sa fraternity nga anang adlawa nagsaulog sa ilang founding anniversary , si Diaz miingon usa kini sa ilang susihon. — IBM BANAT NEWS