CEBU, Philippines — Tulo ka mga construction workers sa gitrabahong usa ka resort sa Sitio Ylaya sa Barangay Agus, Siyudad sa Lapu-Lapu ang nangaangol human matud pa aksidenteng natandog ang usa ka gituohang bomba nga nalubong sa yutang ilang gitrabaho alas 8 pasado ang takna sa miaging Miyerkules sa gabii Agosto 7, 2024.
Ang kapolisan sa Presinto 4 sa LCPO nga gipangulohan ni Police Major Judith Besas dali nga naghimog pakisusi sa maong insidente.
Si Police Colonel Christian Torres, tigpamaba sa Lapu-Lapu City Police Office (LCPO) miingon nga usa tulo nga naangol ang nakabaton og mga samad sa kalawasan human naigo sa shrapnel gikan sa maong bomba nga mibuto.
Dugang pa ni Torres nga nagtrabaho ang tulo dihang kalit lang mibusikad sa ilang nahimutangan ang bomba.
Ang mga sakop sa Explosive Ordnance Unit (EOU) sa LCPO wala pa makatino kun unsa nga matang sa bomba ang niulbo. — IBM BANAT NEWS