CEBU, Philippines — Ang kagamhanan sa Dakbayan sa Sugbo andam na sa ilang pagtabang sa kagamhanan sa Probinsiya sa Sugbo sa nagsingabot nga Pasigarbo sa Sugbo 2024.
Kini ang gipahibalo ni Acting Cebu City Mayor Raymond Alvin Garcia sa pakighinabi niini sa mga tigbalita.
Matud ni Garcia nga lakip sa iyang gimando sa kapolisan ang pagpatuman sa peace and order atol sa kalihokan sa Pasigarbo sa Sugbo nga ipahigayon diha sa Cebu City Sports Center karong Agosto 25, 2024.
Ang kagamhanan sa siyudad ug probinsiya gikatakdang magtigom alang sa ilang pagpangandam. Nasayran nga kapin sa 50 ka dakbayan ug kalungsuran ang moapil sa maong dakong kalihokan
Si Garcia nagkanayon nga sa habig sa Dakbayan sa Sugbo ilaha ang facility ug security ilabi na ang Cebu City Sports Center anaa sa sentro sa siyudad ug ipahimutang usab sa mga tuhaan ang mga contingent nga moapil sa maong kalihokan.
Dugang ni Garcia nga andam na sila sa pagtabang sa probinsiya kalabot sa pagpahigayon sa Pasigarbo sa Sugbo. — BDB BANAT NEWS