Presidente Marcos nakadayeg sa performance sa kapolisan
CEBU, Philippines — Gidayeg ni Presidente Ferdinand R. Marcos Jr. ang "malumo, matinud-anon, ug dili dugoon nga mga operasyon sa Philippine National Police (PNP) atol sa ika-123 nga Police Service Anniversary niadtong Agosto 8, 2024.
Nagkanayon si Presidente Marcos nga sa paglingkod ni National Police Chief P/Gen. Rommel Francisco Marbil sa miaging mga bulan dunay daghang talagsaong mga reporma ug kalampusan ang kapolisan sa nasud busa iya kining giila uban sa tanang opisyal ug personahe sa PNP.
Matud ni Marcos nga nimenus ang krimen sa mga high-risk nga mga lugar tungod sa mas gipakusog nga pagpatrolya ug dugang nga police deployment.
Ubos sa pamunoan ni General Marbil, ang PNP misanong sa 99 porsyento sa mga tawag sa tabang ug gipalambo ang mga paningkamot batok sa cybercrimes pinaagi sa PNP Cybersecurity Operations Center, ug ilegal nga drugas.
Sumala sa PNP nga adunay kinatibuk-ang 16,634 ka operasyon sa ilegal nga drugas ang gipahigayon gikan Abril 1 hangtud Hulyo 31 ning tuiga nga misangpot sa pag-neutralize sa 20,286 ka mga indibidwal ug pagkasakmit sa kapin sa PhP13.72 bilyon nga kantidad sa ilegal nga drugas.
Dugang sa presidente nga mas nilig-on usab ang pagsumpo sa smuggling, ilegal nga sugal, pribadong armadong grupo, human trafficking, ug kriminalidad sa epektibo ug legal nga pamaagi.
Naghimo sab og joint operations ang PNP uban sa Armed Forces for Internal Security nga misangpot sa pag-neutralize sa 1,951 ka miyembro sa lokal ug komunistang teroristang grupo. — Gie-Ann N. Tapic MEL BANAT NEWS
- Latest
