Polis: Lugoson unta apan nisukol

CEBU, Philippines — Lugoson unta apan nisukol maong nahinaykan ug napatay. Mao kini ang gibutyag sa kapolisan may kalabotan sa tanghaga sa kamatayon sa 27-anyos nga saleslady nga si Charina Relativo diha sa giabangan niining lawak sa usa ka boarding house sa Sitio Laguna, Barangay Bulacao sa siyudad sa Sugbu. Nahitabo kini niadtong Agosto 2,2024.

Mao kini ang gibutyag ni Police Colonel Antonietto Cañete, acting City Police Director sa Cebu City Police Office(CCPO) base sa matud pa gitug-an kanila sa suspetsadong giila lang nilang si Darren.

Matud pang Cañete, managhigala ang kapuyo sa biktima ug ang suspek.  Matud pa kun ang kapuyo sa biktima naa sa trabahoan, ang maong suspek matud pa maoy gisaligan niyang pamalihugan aron pukawon si Charina aron dili kini ma-late sa trabaho.

Ug niadtong adlaw nga Biyernes sa alas-7 ngadto na sa alas 8 sa buntag gikatahong nisulod sa kwarto sa biktima ang suspek aron unta kini pukawon nga mao nay naandan niini buhaton kay maoy tugon pirme kaniya sa iyang amigo nga kapuyo ni Charina.

Apan anang tungora, nagmata na si Charina ug naa sa banyo naligo para motambong sa trabaho.

Sumala pang Cañete, gisuwayan matud pa sa suspek nga lugoson ang biktima apan gikatahong mikisi-kisi kini ug nisukol.

Sa kabalakang mosinggit kini ug adunay mga kasikbit nga makadungog gikatahong gikuptan niini ang liog apan nadayunan kini og tuok hinungdan nga nabugtoan kini sa gininhawa.

Aron matago matud pa ang krimen, gisuwayan og sunog sa suspetsado ang kwarto. Mao kini ang rason kun nganong sunog na ang buhok ni Charina sa dihang naabtan sa kapolisan nga wala nay kinabuhi.

"Allegedly nanlaban (ang biktima). That is why (it) resulted to the instantaneous death because he exerted effort to make her silent," sigon ni Cañete.

Sa pangutana kun gilugos sa suspetsado ang biktima, si Cañete miingon nga dili pa sila makasulti bahin niini kay wala pa'y resulta sa autopsy.

"There is no evidence to show it (gilugos), very vital is the release of the report of the crime laboratory, the official report of course is based on their observation and findings. Whether there was rape or non.. We are still waiting," ni Cañete pa.

Gipaabot nalang nga makompleto ang tanang gikinahanglang dokumento ingon ebidensiya aron mapasakaan og kasong murder ang suspetsado.

Ang kapolisan miingon nga dihang ilang giadto ang suspek sa gitagoan niini diha sa Barangay Sambag 2, Cebu City niadtong adlaw nga Sabado sa hapon  nakuhaan kini og armas.

Si Darren gipasakaan na og kasong illegal possession of firearms tungod niini.

Ang suspetsado kinsa nagtaptap sa iyang nawong ug adunay mga patik sa mga bukton, gipresentar ngadto sa tigbalita ug kang Cebu City acting Mayor Raymond Alvin Garcia.

Personal nga miadto sa CCPO si Garcia tungod kay ginungtan niya ang imbestigasyon sukad pa sa pagsugod niini kay matud niya walay luna sa siyudad ang susama niini nga krimen.

Sa pagkasikop sa suspek ug sa posibilidad nga mapasakaan kini og kaso, gidayeg ni Garcia ang paspas nga pagkadakop sa mamumuno.

Apan iyang gimandoan Cañete nga siguraduhong dili lang kutob sa pagsang-at og kaso ang ilang buhaton, gusto ni Garcia nga humanon gyud ang kaso hangtod nga makombikto ang suspek.

"Kay og dili ta moseryoso ani, mo ‘lax gani ta, mogara. Mas daghang mogara tingali nga mga criminal elements," ni Garcia pa. Ang kalamposan sa CCPO karon nga ubos na sa pagpangulo ni Cañete giisip nga puntos sa naulahi ngadto kang Garcia.

Kini tungod kay si Garcia gipaabot nga motudlo og permanenteng mohupot sa posisyon ni kanhi CCPO director Police Colonel Ireneo Dalogdog kinsa gibalhin na ngadto sa Police Regional Office -7. Adunay lima ka pangalan nga gipapilian kaniya ug si Garcia mibutyag nga usa sa lima nga gipapilian kaniya si Cañete.

Si Garcia daan na sab mipahibalo nga ang gipangita niya nga abilidad sa usa ka CCPO director mao ang kahanas pagpangita og solusyon batok mga krimen.

"I commend you today pero make sure that this case is seen to its finish. Unya importante pud kaayo nga prevention, prevention is very important and again I will reiterate also police visibility. Sige ko’g balik-balik ana sad and I think we all have to be vigilant usa sad na ang angay buhaton sa komunidad," matud ni Garcia.

Si Cañete sa iyang bahin mitug-an sa media nga bisag dili siya ang opisyal nga matudlong City Police Director, ang importante nga gihimo niya iyang trabaho para sa kaayohan sa katawhan. (BANAT NEWS)