Modern PUJ operators supak sa suspensyon sa PTMP

CEBU, Philippines — Ipadayon dili suspensiyon maoy singgit sa dili mominos sa 22 ka mga transport groups sa Sugbo nga nipahigayon ug Unity Walk rally kagahapon may labot sa plano sa Senado nga suspensuhon ang programa sa modernisasyon sa public transport sa nasud o Public Transportation Modernization Program (PTMP).

Ang Unity Walk nagsugod sa may Fuente Osmeña Circle sayo sa buntag adlaw nga Lunes ug gitapos nila sa buhatan sa rehiyonal nga opisina sa Land Transportation Franchising and Regulatory Board (LTFRB)-7 sa may dalan Echavez ning Dakbayan sa Sugbo.

Ang niapil sa maong unity walk rally naglangkob sa drivers, conductors, ug mga trabahante sa opisina. Nangulo sa maong kalihukan ang presidente sa Federation of Cebu Transport Cooperatives Ellen Maghanoy.

Nanawagan si Maghanoy sa mga niapil sa Unity Walk sa pagpahugot sa ilang baruganan sa tinguha sa Senado nga temporaryo nga pagpahunong sa PUV Modernization program.

Ang maong mga nangapil sa Unity walk adunay bitbit nga mga placards nga nagkanayon “Modernization program ipadayon, suspension dili ipadayon.”

Ang mga niapil sa Unity Walk nga nagbitbit ug mga placards nga adunay ngalan sa pipila ka mga Senador nibutyag nga nisunod sila sa mandato sa gobiyerno sa pagpatuman sa modernization program ug malaumon sila nga dili himoong ‘sacrificial lamb’ ilabi na dako ang ilang pagsalig sa gobiyerno.

Ang Cebu City Transportation Office nga gipangulohan sa ilang hepe Raquel Arce nibutyag nga wala maparalisar ang transportasyon ug wala nakamugna og problema sa trapiko ang maong kalihokan.

Gibana-bana sa CCTO nga adunay 1,500 ka mga tawo ug dili mominos sa 20 ka mga sakyanan ang nisalmot sa maong kalihokan nga gitapos sa alas-11 sa buntag ang maong kalihukan. (BANAT NEWS)