RTWPB mosugod na sa pagtuki alang sa umento sa suhulan

CEBU, Philippines — Nakadesisyon na ang Regional Tripartite Wages and Productivity Board (RTWPB)-7 nga sugdan na ang wage determination process kun pagtuki sa suholan sa mga mamumuo sa rehiyon.

Gipagawas na ang Notice of Public Hearing nga gi-isyu ni RTWPB-7 Chairperson Lilia A. Estillore, nga gipublikar sa The Freeman newspaper niadtong August 2, 2024.

Dinhi gitakda ang sunod sunod nga public hearing nga himoon dinhi sa rehiyon.

Sugdan kini sa August 20, 2024 sa alas 8:30 sa buntag nga himoon diha sa Annex to Main Dining Hall, DepEd Ecotech Center, Sudlon, Lahug, Cebu City, Cebu.

Ang sunod nga hearing unya sa August 28, 2024 alas 8:30 sa buntag diha sa Municipal Roofdeck, Balamban Municipal Hall, Balamban, Cebu.

Sa August 30, 2024 alas 8:30 sa buntag diha sa Captain Hall 1, 2nd Floor, Capitancillo Café and Restaurant, Bogo City. September 3, 2024 sa mao gihapon nga oras diha sa Jordan 1, Bethel Guest House, Dumaguete City, Negros Oriental.

September 3, 2024 - Grand Ballroom, The MetroCentre Hotel and Convention Center, Tagbilaran City, Bohol.

Segun sa ilang statement, ang RTWPB-7 miingon nga gawas sa pagtuki kabahin sa isyu sa minimum wage adjustment, ang Board mangayo usab og opinion sa mga stakeholders’ kabahin sa possible nga simplification sa wage structure.

Ang pagpahigayon og public hearing maoy kabahin sa mandato sa Board nga mo-review matag karon og unya sa minimum wages sa rehiyon.

 “The public hearing is called for to gather the general sentiments of the concerned stakeholders which shall be taken into consideration when the Board makes its decision later,” segun sa ilang statement.

Ang Wage Determination naghatag og pagtugot sa pagpahigayon og public hearings 60 ka adlaw sa dili pa moabot ang anniversary date sa kasamtangan nga Wage Order.

Ang existing wage order, ni epekto niadtong October 1, 2023, ug ang August 2, 2024 maoy magsilbing pagsugod sa 60-day period sa higayon nga mapahigayon ang public hearing.

Una niini si Estillore miingon nga ang wage board posibleng mohatag og laing hugna sa wage increase karong buwan sa Oktubre ning tuiga.

Suma pa ni Estillore nga ang seven-member board sa RTWPB-7 nagtagbo na aron pagtuman sa marching order ni President Ferdinand “Bongbong” Marcos, Jr. niadtong Labor Day, May 1, 2024, nga nagmando sa wage policy making bodies sa gobyerno sa dinalian nga pag review ug pag adjust sa suhulan sa mga mamumuo sa nasud. The Freeman