CEBU, Philippines — Gitinguha ni Mandaue City Mayor Jonas Cortes nga mapalambo pa ang serbisyo medical sa kagamhanan ngadto sa mga Mandauehanon nga maoy nakaaghat kaniya sa pagpakighiusa sa Department of Health (DOH) alang sa Health Care Provider Network sa gobyerno.
Gihatagan ni Mayor Cortes og gibug-aton ang serbisyong medical ug ang paghatag og lig-on nga serbisyo sa mga Barangay Health Centers.
Sa nasayran ang Department of Health-7 milusad sa Health Care Provider Network (HCPN) diha sa Mandaue City aron makab-ot ang Universal Health Care (UHC) vision.
Tumong sa maong programa nga kahatagan og insaktong serbisyo ang matag-Mandauehanon kabahin sa serbisyong medical.
Sa Health Care Provider Network gipalig-on ang sistema sa gobyerno sa paghatag og komprehensibong serbisyong medical, dental, mental ug emergency care nga panginahanglan.
Nag-alayon ang nasudnong kagamhanan pinaagi sa DOH ngadto sa Mandaue City ingon man sa kabarangayan alang sa sayon nga access sa katawhan sa serbisyong medical.
Sa Health Care Provider Network adunay gihimo nga sistema sa DOH ug Mandaue City Health aron giyahan ang katawhan panahon sa panginahanglan sa serbisyo sa panglawas.
Sa mga pasyente nga dili emergency ang Mandaue City Health adunay Primary Care Facilities.
Si Mandaue City Health Officer Dr. Debra Maria Catulong miingon nga sa maong programa nga gilusad ilang gihimo ang pagpaduol sa serbisyong medical sa katawhan pinaagi sa pagbisita sa mga purok alang sa bakuna ug paghatag og insaktong family planning.
Nunot niini ang kagamhanan sa siyudad sa Mandaue adunay dugang mga doctors sa Mandaue City Health nga moatiman sa mga pasyente.
Ang Mandaue City maoy labing-una nga LGU sa Metro Cebu nga adunay Health Care Provider Network. (BANAT NEWS)