Talisay Police gidayeg sa Hunta Probinsyal
CEBU, Philippines — Giaprubahan sa Cebu Provincial Board ang resolusyon sa pagdayeg sa mga kapolisan sa Talisay City Police Station human sa pagkasikop sa usa ka high-value drug personality diin nasakmit nila ang P10.2 milyones nga balor sa shabu.
Ang maong operasyon nahitabo niadtong Hulyo 19 diin nadakpan si Annabel Cabellon Cabriana alas Kolot, 22 anyos, nga taga Sitio Hawod, Brgy. Bulacao, syudad sa Talisay.
Matud sa awtoridad, si Cabriana nagsugod sa ilegal na negosyo niadtong tuig 2022. Sa wala pa ang operasyon, usa na ka semana kining gi-monitor sa kapolisan human nakadawat ang kapulisan og impormasyong si Cabriana apil sa usa ka large-scale nga negosyo sa ilegal na drugas.
Human makompirmar ang impormasyon, gilusad dayon sa Drug Enforcement Unit sa Talisay ang operasyon nga niresulta sa pagdakop sa mga kapulisan sa maong babaye.
Ang resolusyon gipangamahan ni PB Member Thadeo Jovito Ouano kinsa naglingkod nga chairman sa Committee on Public Safety, Peace, and Order; ug Dangerous Drugs Prevention.
Sumala pa niya, ang maong operasyon nagpakita og dakong determinasyon sa Anti- Drug Enforcement Forces sa paggamit sa oportunidad aron mahunong ang kriminalidad sa Probinsya sa Sugbo. (BANAT NEWS)
- Latest
