CEBU, Philippines — Dili momenus 51 ka mga contingents sa mga lungsod ug siyudad sa Probinsya sa Sugbo ang magtigi sa Pasigarbo sa Sugbo karong tuiga.
Si gobernador Governor Gwendolyn Garcia mitigom sa mga mayor ug tourism officers sa mga LGUs niadtong Agosto 2 aron hisgotan ang mga kinahanglan nga preparasyon sa maong festival.
Ang siyudad sa Lapu-Lapu moapil sa kompetisyon pinaagi sa Garbo sa Lapu-Lapu Festival niini samtang ang Cebu City moapil isip guest contingent.
Si Garcia mianunsyo sab nga mohatag og subsidiya alang sa mga contingents nga moapil. Tag P3 milyones alang sa mga LGUs sa mainland samtang tag P3.5 million ang sa mga munisipyo nga naa sa isla.
Ang Pasigarbo Festival karong tuiga ipahigayon balik sa Cebu City Sports Center (CCSC) sa Agosto 25 diin ang street dancing competition magsugod alas 2 sa hapon samtang ang ritual showdown magsugod alas 6 sa gabii
Gihagit ni Garcia ang mga mayor nga mo "level up" sa performance sa mga contingents niini ug gilatid usab sa mga lokal nga opisyal ang guidelines sa maong kompetisyon.
Si bokal Red Duterte kinsa maoy chairman sa Committee on Tourism sa provincial board, nagkanayon nga mi "evolve" na ang Pasigarbo kon diin ang mga contingents kinahanglan nga mahimong "innovative" sa ilang presentasyon gikan sa dance style ug genres o choreography ngadto sa production naglakip niini ang costume, design, ug set design, graphics, ug uban pa.
Apil usab sa pag "level up" mao ang pagdaghan sa mga performers gikan sa 160 ngadto sa 200 kabuok matag contingent.
Sa mga festival queens, 47 pud ang mag tigi.
samtang sa mga award nga ihatag mao ang best ritual showdown; best in streetdancing; best festival jingle; best in costume; best decorated float; best decorated carroza, ug best mayor’s introduction video.
Si Garcia nagkanayon nga ang Pasigarbo sa Sugbo naghatag og panginabuhian sa pipila ka mga Sugboanon gikan sa mga choreographers and artists, designers, song writers ug uban pa. “We have proven from the very start nga ato gyud gipamugna ang mga festivals nga diay dili ni paarte arte lang, dili ni kay aron lang gyud pagsayaw sayaw lang, this is a serious economic activity that boost the economy of each and every local government unit” matud ni Garcia.
Ang Pasigarbo sa Sugbo gitawag nga “festival of all festivals” sa Probinsya sa Sugbo kon diin mao kini ang highlights sa usa ka bulan nga selebrasyon sa kasumaran sa Probinsya sa Sugbo matag bulan sa Agosto.
Samtang gikompirmar usab ni Mandaue City mayor Jonas Cortes nga mosalmot sila sa Pasigarbo karong tuiga diin suma pa sa mayor nga kanunay gyud sila nga nagsuporta sa maong kalihukan sa probinsiya. (BANAT NEWS)