CEBU, Philippines — Driver sa Modernized PUJ nga nakaligis sa bukton sa usa ka nurse ang gipasakaan na og kaso.
Wala magkasabot ang 56anyos nga nurse ug ang 57anyos nga driver sa modernized PUJ hinungdan nga gipasakaan gyud og kasong reckless impudence resulting in physical injury ang maong driver.
Sumala pa ni Jonathan "Joy" Tumulak ang pangulo sa CTTODA nga ang nurse nagpabilin pa nga nagpaalim sa tambalanan human naputlan sa iyang bukton gumikan kay nalatayan gyud sa ligid sa jeep.
Ang maong disgrasya nahitabo niadtong Hulyo 25 sa buntag sa dihang padung ang biktima sa iyang trabahoan sa may N. Bacalso sa Barangay Tabunok Talisay City.
Si Tumulak nanawagan nga unta ang tanang motorista himuon ang defensive driving aron kalikayan ang disgrasya sa dalan.
Likayan daan sa gagmay nga sakyanan ang dagko nga sakyanan tungod kay aduna kini higayon nga mabutang sa blindspot o di nila makit-an.
Usa ka panghitabo nga nakalangan sa mga motorista mao ang disgrasya nga nahitabo sa taytayan sa Mananga diin usa ka awto ang nasaghiran sa dakong truck niadtong Martes.
Nilanat sa 30 minutos una pa nakuha ang nalambigit sa disgrasya nga nakamugna sab og taas nga kutay sa mga sakyanan. (BANAT NEWS)