CEBU, Philippines — Dili mominos sa 12 ka mga timbangan sa Carbon Market ang gipangsakmit niadtong Huwebes sa gabii.
Ang Market Operation Division pinangulohan sa Market Administrator Robert Barquilla, nihimo og operation sa mga manindahay sa Carbon Market hinungdan nga nasakmit ang giingong 12 ka mga tikasan nga timbangan.
Ang MOD, padayon sa paggukod sa mga manindahay nga mapahimuslanon gamit ang mga timbangan nga kulang sa timbang.
Gitug-an ni Barquilla, sukad sa buwan sa Enero karong tuiga hangtud niadtong Huwebes sa gabii niabot sa 104 na ka mga timbangan ang nasakmit sa ilang buhatan.
Sa pagkakaron gi-inventory sa MOD ang mga timbangan nga nasakmit aron masuta kun pila sa kinatibuk-an nga mga timbangan ang ilang panggub-on.
gikatakda nilang ipahigayon ang ceremonial destruction kun pagguba sa mga timbangan atubangan ni acting Cebu City Mayor Raymond Alvin Garcia. (BANAT NEWS)