MCWD ug Cebu City parehong moukopar sa building

CEBU, Philippines — Ang satellite office nga gipanag-iya sa Metropolitan Cebu Water District (MCWD) ug giukopar na karon sa kagamhanan sa Dakbayan sa Sugbo gipanglantawan nga dungan nga gamiton sa duha ka partido.

Nunot sa negosasyon tali sa kagamhanan sa siyudad ug MCWD, ang Satellite office nga dugay nang adunay legal dispute gilantaw nga mahimong shared office sa nahisgutang duha ka habig apan niining higayona mas ubos ang abang.

Kini matud ni MCWD Chairman of the Board Joey Daluz sa pakighinabi sa The Freeman kagahapon.

Matud ni Daluz nga nagkasabot sila ni Acting Cebu City Mayor Raymond Alvin Garcia nga ang second floor sa maong edipisyo maoy gamiton sa kagamhanan sa siyudad samtang ang ubos gamiton sa MCWD.

Ang Commission on Audit (COA) bag-o lang ni flagged down sa kagamhanan sa siyudad sa paggasto og P5 milyones alang sa renovation sa American-period building nga nahimutang tapad sa MCWD main building nga walay pormal nga lease agreement sa MCWD.

Matud ni Daluz nga lakip sa ilang nasabotan mao ang pagdonar sa P5 milyones nga kantidad sa renovation diin ang kagamhanan sa siyudad duna pay utang sa abang ngadto sa MCWD.

Si Daluz nagkanayon nga wala pa mahuman ang maong kontrata bisan ang kagamhanan sa siyudad mag-abang na usab sa satellite office gikan sa Hulyo 2024 ug molungtad kini og usa ka tuig.

Sa ilang annual audit report, ang COA nirekomendar sa siyudad nga makig-dialogue sa MCWD ug husayon ang mga dili pagsinabtanay sa binuwan nga bayronon sa abang pinaagi sa paggamit sa gilatid sa Government Procurement Reform Act.

Namatikdan sa mga state auditor nga human sa renovation sa building niadtong 2023 giukopar dayon sa siyudad alang sa pipila ka mga opisina niini nga walay pormal nga kontrata tungod sa wala pagsinabtanay sa kantidad sa abang.

Dugang ni Daluz nga nagkasabot sila nga ang kantidad sa abang naa sa P200,000 diin giukopar nila ang ikaduha nga andana. (BANAT NEWS)