CEBU, Philippines — Malaumon ang kaparyentihan sa Sugbuanong atleta nga si Elreen Ann Ando kinsa misalmot sa 2024 Paris Olympics nga makalangkat kini og medalya.
Si Ando, nagtubo sa Barangay Carreta ug usa kini sa pambato sa nasud alang sa natad sa weightlifting sa Paris Olympics.
Adunay gitaod nga tarpaulin sa panimalay ni Elreen, diin sagul-sagul ang gibati sa mga katagibarangay sa kulbahinam nilang pagpaabot sa tigi niini nga himoon karong Agusto 8.
Labaw na ang iyang mga igsoon nga mihatag sa ilang hugot nga pag-ampo ug suporta alang sa kalampusan sa ilang manghud.
Mapasalamaton ang pamilyang Ando sa hugot nga suporta sa mga Sugbuanon diin natagaan og financial assistance gikan sa kagamhanan sa Dakbayan sa Sugbo ug sa mga pribadong sector nga maoy gigamit sa Bisaya nga Olympians.
Ang Olympian nga si Elreen wala nay ginikanan ug ang uyoan niini nga si Kapitan Marciano Ando ang nibarug alang sa iyang mga pag-umangkon.
Emotional nga gipaambit sa uyoan ang pangindahay niini alang sa kalampusan sa iyang pag-umangkon nga kanunay niyang giawhag nga magkugi lang ubanan sa pag-ampo kay maabot ra gayud niini ang iyang mga pangandoy. (BANAT NEWS)