Babaye nga mabdos gikulata sa hubog

CEBU, Philippines — Usa ka 35-anyos nga lalaki ang natingkagol sa detention facility sa Mambaling Police Station human giingong nangulata og upat ka buwan nga mabdois diha sa Barangay Duljo Fatima, Dakbayan sa Sugbo, niadtong Martes sa hapon.

Base sa imbestigasyon sa kapolisan ang suspetsado nangangkon nga hubog siya niadtong higayona dihang iyang gisukmag ang ilang silangang nga babaye kinsa mabdos og upat ka buwan ug wala siya masayod sa iyang gibuhat.

Ang suspetsado nangangkon nga tulo ka botilyang ilimnong makahubog ang iyang nainom ug nawala siya sa iyang kaugalingon human siya makainom ug nakabuhat sa maong kalapasan.

Apan giangkon usab sa suspetsado nga nakahinumdum siya kong asa dapita sa lawas naigo ang biktima sa iyang pagpanukmag.

Ang biktima daling nangayo og tabang sa polis nga nadestino sa barangay sa nahisgutang lugar.

Base sa imbestigasyon sa kapolisan nga giingong ang suspetsado magmaoy gyud kini kong mahubog.

Ang suspetsado nagmahay na kini sa iyang gibuhat ug naglaom nga pasayluon kini sa biktima.

Gikataho nga ang biktima nagpahiling kini sa tambalanan ug nibahad nga mosang-at og kaso batok sa suspetsado.

Matud sa biktima nga wala siya masayod sa hinungdan nga gisukmag siya sa suspetsado.

Sa iyang bahin, si Police Lieutenant Lyndon Mondragon, deputy station commander for administration nibutyag nga padayon pa nilang gisusi ang background sa suspetsado lakip usab ang posibleng mga kaso nga giatubang. Ang kapolisan nanawagan sa mga biktima sa pagpangdagmal nga modangop dayon sa mga ahensiya sa kagamhanan aron maaksiyonan. (BANAT NEWS)