Mga establisamento sa ICT ug online gaming higpit nga gibantayan
CEBU, Philippines — Hugot karon nga gibantayan sa kagamhanan sa Siyudad sa Mandaue ang 100 ka establisamento nga nalambigit sa information and communication technology (ICT) ug online gaming susama sa Philippine Offshore Gaming Operators (POGO).
Lakip sa naghimo og higpit nga pagbantay mao ang buhatan sa Business Permit and Licensing Office (BPLO) sa Siyudad sa Mandaue.
Si Atty. Lizer Malate, pangulo sa BPLO nagkanayon nga sa kasamtangan ilang hugot nga gibantayan ang 141 ka ICT nga establisamento ug napulo ka online gaming nga establisamento.
Sa nasayran nga ang siyudad nagtugot sa ilang opersyon sa 141 ka ICT-related business diin nakapasulod usab kini og trabahao sa 2,000 ka tawo sa tuig 2023.
Matud ni Malate nga igo lang nilang gituman ang direktiba nga giluwatan sa Department of Interior and Local Government (DILG) nga nagmando sa mga lokal nga kagamhanan sa paghimo og inventory sa mga online gaming operations nga anaa sa ilang hurisdiksiyon.
Gipasabot sa DILG nga ang unauthorized POGO activities posible usab kini nga magamit sa cybercrimes, scams, digital fraud ug human trafficking.
Dugang ni Malate nga ang ilang buhatan ang nakapahigayon na og inspeksiyon sa mga online gaming operations ug ICT nga mga patigayon sa siyudad. (BANAT NEWS)
- Latest
