Archival nidawat sa tanyag mokandidato pagkamayor

CEBU, Philippines — Opisyal nga gidawat ni Konsehal Nestor Archival Sr. ang tanyag ni kanhi Cebu City mayor Tomas Osmeña sa pagkandidato isip mayor sa Dakbayan sa Sugbo kinsa si Osmeña maoy iyang running-mate sa 2025 election.

Dugang pangalan ang tanawonon karon alang sa 2025 midterm election human official na nga gipahibalo ni Archival ang iyang tinguha nga modagan sa labing taas nga posisyon sa siyudad.

Si Archival ang ikatulong aspirant nga nipadayag subay sa vocal manifestations nila ni suspended Mayor Michael Rama ug kanhi customs commissioner Yogi Felimon Ruiz nga modagan sa samang posisyon.

Sa pag-anunsiyo ni Archival atol sa joint birthday celebration  ni Osmeña ug sa iyang asawa, si Margot Osmeña niadtong Martes sa gabii, Hulyo 30, 2024 nipadayag nga official na ang Archival-Osmeña tandem alang sa political slate sa Bando Osmeña Pundok Kauswagan (BOPK).

Sa video nga gi-post ni Archival sa iyang Facebook page nagpakita kini sa excerpt sa iyang pagtunol og cake nga adunay nakabutang nga "YES" sa ibabaw nga nagpasabot sa iyang tubag sa kanhi tanyag ni Osmeña nga modagan pagka-mayor sa siyudad niadtong Pebrero 29, 2024.

Gikataho nga si Osmeña nagkanayon nga si Archival maoy “the best choice for Cebu City’s future” ilabi na kay ang mga batan-on maoy nag-unang prayoridad niya.

Iyaha usab nga gideklara kaniadto nga kon makadesisyon si Archival nga modagan sa pagka-mayor nisaad si Osmeña nga suportahan niya kini pinaagi sa pagdagan pagka-bise mayor.

Sa samang selebrasyon, gipahibawo usab ni Archival nga si kanhi south district representative Rodrigo “Bebot” Abellanosa maoy nominado sa partido nga modagan sa pagkakongresista sa south district, ug si incumbent Councilor Mary Ann de los Santos sa north district. (BANAT NEWS)