CEBU, Philippines — Gihulagway sa Police Regional Office(PRO)-7 nga usa ka 'eye opener' alang kanila ang nahitabo kang Police Staff Sergeant Orvin Seth Felicio nga gipusil patay sa usa ka 16-anyos nga lalake niadtong Sabado sa kaadlawon sa Barangay Banilad, dakbayan sa Mandaue.
"So this is very sad reminder for us in the PNP that our lives are always at risk but our Regional Director Police Brigadier General Anthony Aberin in the command conference this morning reminded everyone nga we should always keep our guards in all instances not only when you are on duty but when you are also off duty para wala'y mga unnecessary loss of lives nga matala," matud pang Police Lieutenant Colonel Gerard Ace Pelare, tigpamaba sa PRO-7.
Si Felicio igo ra nibadlong sa 16-anyos nga batan-on kay naa pa sa dalan bisan og lawom na ang kagabhion ug dunay curfew apan gipusil siya sa batan-on nga nakaingon sa iyang kamatayon.
Nitahan sa iyang magtutudlo ang batan-on ug nakasohan karon og murder.
Sa pikas bahin, usa ka resolusyon ang gipasar sa Konseho sa Siyudad sa Mandaue nga nagkondenar sa nahitabo kang Felicio nga sakop sa Presinto 5 sa Mandaue City Police Office (MCPO).
Mipadangat usab sila sa ilang pahasubo ngadto sa nabiyaang pamilya sa maong polis. (BANAT NEWS)