CEBU, Philippines — Mokabat sa 68 ka mga tinun-an sa Mandaue City College ang nakapahimulos sa scholarship program sa lokal nga kagamhanan sa siyudad sa Mandaue.
Si Mandaue City mayor Jonas Cortes mao ang mitunol sa maong scholarship grant ngadto sa mga tinun-an niadtong Biyernes Hulyo 26, 2024 human usab sila makapasar sa gipahigayon nga entrance test.
Suma pa ni Joan Impas usa ka single mother nga taga Barangay Umapad nga ang iyang anak makapadayon na sa pagtungha sa kolehiyo diin mokuha kini sa kursong tourism ug ang maong scholarship daku nga tabang sa iyang pag-eskwela.
Si Mayor Cortes niingon nga tinguha karon niya ang pagpalapad sa mga scholar pinaagi sa paglakip sa mga atleta sa scholarship grant nga gipasiugdahan sa dakbayan.
Kauban ni Mayor Cortes sa pagtunol sa maong scholarship grant certificate sa kagamhanan sila si Bise Mayor Glenn Bercede, ug Malcolm Sanchez, chairman sa committee on education sa konseho sa dakbayan. (BANAT NEWS)