CEBU, Philippines — Gilaraw karon ang pag-establisar og flights o direktang biyahe sa eroplano gikan sa Yangyang Airport sa Gwangwon sa South Korea padulong sa Sugbo pinaagi sa Mactan Cebu International Airport (MCIA).
Apil kini sa nahisgotan tali sa delegasyon sa Probinsya sa Sugbo gipangulohan ni Bise Gobernador Hilario Davide III ug sa delegasyon sa Gangwon Province sa Republic of Korea gipangulohan pud sa ilang Deputy Governor nga si Jeong Kwang-Yeol.
Ang maong plano naumol sa tinguha nga mas mapamub-an ang biyahe padulong sa Gangwon nga dili na kinahanglan pa og layover sa sa Incheon Airport sa Ninoy Aquino International Airport (NAIA). Bisan ang Deputy Governor sa Siem Reap sa nasud sa Cambodia nipadangat pud og interes pag-abli og flight padulong sa Sugbo.
Kaniadto aduna nay unta direktang byahe padulong sa Siem Reap-Angkor International Airport apan wala na mapadayon human sa pandemiya sa Covid-19. Karon ang parehong probinsya naglaraw sa pagbalik sa maong routa aron mas dali ang pagbyahe hilabina sa mga turista.
Ang Sugbo ug ang Siem Reap nagkasinabot pud nga parehong i-promote ang business matching events og gitawg nga (B2B) aron mapalambo ang investment sa parehong lalawigan.
Sumala sa Capitol Information Office, ang Yogyakarta sa Indonesia pinaagi sa Deputy Governor Paku Alam X, ug Tuv sa Mongolia, pinaagi ni Governor Munkhbaatar Demberel mipakita sab og samang interes sa Second Language (ESL) nga industriya sa Sugbo.
Ang maong mga kalamboan nahisgtoan kin isa tigom atol sa East Asia Inter-Regional Tourism Forum (EATOF) nga gipahigayon karon sa Mongolia. Sunod tuig ang Probinsya sa Sugbo na sab ang gipaabot nga mohost sa EATOF general assembly .(BANAT NEWS)