Natulog sa atop sa trak, natagak patay

CEBU, Philippines — Patay ang usa ka 17-anyos nga truck boy human aksidenteng natagak gikan sa ibabaw nga bahin sa delivery truck nga iyang gisakyan diha sa Barangay Poblacion, Lungsod sa Sibonga pasado alas 7 kagahapon sa buntag adlaw nga Sabado.

Ang biktima nga 17-anyos nga lalake residente sa Sitio Cogon, Barangay Datag Maribago, dakbayan sa Lapu-Lapu. Ang driver sa delivery truck mao si alyas Jorel, 24, nagpuyo sa Barangay Datag Maribago, Lapu-Lapu City.

Sa imbestigasyon sa Sibonga Police Station ang delivery truck naabot maong lugar alas 11:50 sa gabie sa adlaw'ng Biyernes aron unta mo- deliver og produkto sa usa sa mga iladong tindahan sa lugar.

Apan gumikan kay sirado na ang tindahan nangatulog una sila. Ang driver ug laing truckboy adto nangatulog sa sud sa front seat apan ang namatay didto sa atop sa maong trak nihigda aron matulog.

Pagka alas 6:35 sa buntag kagahapon, Sabado, Hulyo 27, 2024 mimando sa driver sa laing truck boy nga pukawon ang biktima kay ibalhin ang van.

Sa dihang nitubag na ang batan-on diha sa atop mibalik ang maong truckboy sa front seat ug gipaandar na dayon sa driver ang van.

Apan paglabay sa 15 minutos nakit-an nalang ang biktima nga nagbuy-od na kini sa dalan kay natagak diay kini gikan sa ibabaw sa van.  Nagtuo sila nga nakamata na kini ug wa na mibalik og katulog human gipukaw.

Daling ninaog ang driver ug nangayo og tabang.  Gidala pa sa Deiparine Community Hospital ang biktima apan nakabsan gyud kini sa kinabuhi.

Sa pagkutlo ning maong balita naa pa sa kustodiya sa Sibonga Police Station ang driver sa deliver truck. (BANAT NEWS)