CEBU, Philippines — Nadakpan sa entrapment operation sa mga sakop sa Lapu-Lapu City Office (LCPO) ang usa ka transwoman nga giingong nangilkil ngadto sa kanhi karelasyon niining 24-anyos nga Korean national nga giingong gihulga niya nga ipagawas sa social media ang ilang law-ay nga mga hulagway.
Si Police Captain Rachel Dumaguing, Public Information Officer (PIO) sa LCPO miingon nga ang 24 anyos nga biktima midangop sa ilang buhatan tungod sa gibuhat sa suspek hinungdan nga gihimo gilayon ang entrapment operation.
Ang nadakpan mao ang 23 -anyos nga transwoman nga molupyo sa Lungsod sa Cordova.
Matud pa ni Dumaguing nga gihimo ang panagtagbo sa Sitio Datag sa Barangay Maribago sa maong dakbayan. Gikataho nga gikilkilan sa suspek og P10 mil ang biktima.
Human matud pa gidawat sa suspek ang maong kwarta gidakop kini dayon sa mga polis nga naa sa palibot.
Ang suspetsado gitanggong karon sa LCPO holding facility samtang giandam na usab ang kaso nga extortion batok niini. — IBM BANAT NEWS