Towing ipatuman sa siyudad sa Talisay

CEBU, Philippines — Mopatuman na unya og towing ang Dakbayan sa Talisay ngadto sa mga sakyanan ug motorsiklo nga pataka lang og parking.

Si konsehal Danny Caballero, chairman sa committee on traffic nipapasar sa ordinansa alang sa pag gamit og towing. Si Caballero niingon nga ang ordinansa alang sa kaayohan sa kinabag-an aron dili mabalda sa pagbiyahe ang mga motorista.

Hinuon ang mga towing truck naa gyud ang mga personnel sa CT-TODA ug ang makalapas niini tagaan sab og pipila ka minutos sa pagkuha sa ilang sakyanan nga nagbabag sa karsada.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga ang ordinansa makapamatngon sa mga motorista nga di na magpataka og parking sa ilang motorsiklo ug sakyanan.

Sigon pa ni Tumulak nga epektibo ang ilang pagtowing sa bisan asa nga karsada basta ilang makita nga makabalda kini sa dagan sa trapiko.

Gani daghan na sila og nadawat nga reklamo o sumbong labot sa pagpataka og parking.

Sa pagkakaron gipaabot pa nila ni Tumulak nga ma publisar ang ordinansa o ba kaha ang pagtugot sa provincial board aron sila makapatuman na dayon sa bag-ong napasar nga balaod. —  MEL BANAT NEWS