CEBU, Philippines — Gilugwayan ni Education Secretary Sonny Angara ang deadline sa performance ratings para sa SY 2023-2024 hangtud sa Septiyembre 2024 ug gipa-postpone ang Results-Based Performance Management System (RPMS) para sa SY 2024-2025.
Kini aron maka focus ang mga magtutudlo ug dili magtutudlo nga kawani alang pag-andam sa pagsugod sa klase.
Nasuta ni Angara nga usa sa mga reklamo sa mga magtutudlo mao ang ilang kabalaka bahin sa pag-overlap sa RPMS sa pagsugod sa school year, nga nagkinahanglan og daghang dokumentasyon nga madungan sa Brigada Eskwela.
Ubos sa gipirmahang memorandum ni Angara, ang submisyon sa RPMS para SY 2023-2024 alang sa performance review ug evaluation mabalhin sa September 15 samtang September 30 alang sa rewards ug development planning.
Para sa SY 2024-2025, ang tanang school-level RMPS nga mga aktibidad sa eskuylahan, sama sa performance planning ug evaluation gipahimutang hangtod sa sunod nga pahibalo.
Subay niini gimanduan ni Angara ang DepEd Executive Committee nga magtukod ug Task Force aron repasohon ug pasimplehon ang mga proseso sa RPMS para sa SY 2024-2025 sa lebel sa eskwelahan.
Apan alang sa mga non-school-based personnel sa DepEd Central Office, Regional Offices, ug Schools Division Offices, ang RPMS para sa FY 2024 magpadayon sumala sa plano.
Sa laing bahin mohangyo ang konseho sa Dakbayan sa Talisay ngadto sa mga opisyales sa barangay nga patabangon sa trapiko ang ilang mga barangay tanod inig abli sa klase.
Si konsehal Danny Caballero, chairman sa committee on traffic management nibutyag nga mas daghan ang magtabang mas epektibo kini.
Una niini, ang City of Talisay-Traffic Operation Development Authority (CT-TODA) nangandam na sa pagbukas sa klase sa pampublikong tunghaan sa sunod semana.
Nagkanayon si Caballero nga kadtong mga barangay nga adunay mga tunghaan mohimo na sa pagpangandam sab niini.— Gie-Ann N. Tapic/Gabriel C. Bonjoc/MEL BANAT NEWS