CEBU, Philippines — Gidawat sa Department of Public Works and Highways (DPWH) Region VII si Engr. Danilo J. Villa Jr. isip bag-ong regional director, human sa pagretiro ni RD Ernesto S. Gregorio Jr.
Nagkanayon si Villa nga tumong niya nga maabot ang rehiyon 7 sa kinatas-an diin kini mahimong mas abtik, responsive, ug komitado sa paghatud sa dekalidad nga pagpalambo sa imprastraktura ug serbisyo publiko, samtang nagpasiugda ug balanse sa trabaho ug kinabuhi para sa ilang mga trabahante.
Atol sa iyang pakigpulong iyang gibutyag nga lakip sa iyang plano alang sa DPWH-7 mao ang gipauswag nga pagbansay alang sa kahanas sa pagdumala, mas paspas nga proseso sa pag-hire, ug pagbalhin sa mga job order nga empleyado ngadto sa permanente aron mapalig-on ang mga trabahante.
Gihatagan usab niya og gibug-aton ang balanse sa trabaho ug kinabuhi pinaagi sa paglakip sa pisikal ug kalingawan nga mga kalihokan.
Sa laing bahin, si RD Ernesto S. Gregorio Jr. nagpasalamat sa mga District Engineers ug Asst. District Engineers, Division Chiefs, ug mga rank-and-file employees sa Region VII sa walay puas nga kooperasyon sulod sa iyang kapin duha ka tuig nga termino isip regional director sa Central Visayas.
Siya naghangyo usab kanila og susamang kooperasyon nga naghimo sa DPWH VII isip usa sa top-performing regions sa pag-implementar og infra projects sa tibuok nasud para sa bag-ong regional director. (BANAT NEWS)