Pekeng doktor nadakpan

CEBU, Philippines — Usa ka babaye nga giingong peke nga doktor ang gidakop atol sa entrapment operation nga gipahigayon sa mga tinugyanan sa National Bureau of Investigation Central Visayas niadtong adlaw nga Biyernes.

Ang nasikop naila nga si Dimber Dela Cruz Celis. Ang maong dinakpan nakalapas sa illegal practice of medicine ubos sa RA 2382, Swindling ubos sa Revised Penal Code in relation sa Sec 6 sa RA 10175 sumala pa sa NBI-CEVRO.

Matud pa sa NBI, duna niduol kanila aron magpatabang tungod kay nadaut ang iyang nawong nga matud pa tungod sa gibuhat sa suspek.

Giingong nagkalain ang biktima ug suspek pinaagi sa Facebook post kay nag advertised kini sa iyang serbisyo nga pangpagwapa pinaagi sa injections. Apan paglabay sa usa ka semana mihubag kini og na infected.

Ang biktima wala magtuo nga dili diay kini lisensyadong doktor busa wala kini pagduha-duha sa pag avail sa serbisyo.

Giingong nagpa- inject siya sa iyang jaw line ug under-eye skin para mogwapa apan pipila ka semana human sa procedure aduna siyay mga gipamati sa nawong ug mihubag kini.

Sa dihang iyang gitawgan ang suspek aron konsultahon bahin niini dili na makontak ang iyang numero ug iyaha nalang nasayran nga gi-block na siya niini.

Tungod niini, niduol siya og espesyalistang mga doktor nga pulos mirekomendar nga kinahanglan siyang operahan.

Ang suspetsado kinsa ni block sa biktima kalit kini nikontak ug nipahibalo nga moanhi kini sa Cebu aron tarungon ang procedure sa biktima, apan nangayo kini og dugang bayad.

Mao kini ang hinungdan nga nidangop siya sa NBI-CEVRO hinungdan sa gihimong entrapment operation.

Ang suspetsado naaktohan nga nag inject og wala mahibaw-ing medisina hinungdan ngadto sa biktima sa dihang kini gidakop sa NBI.

Nasuta sab nga ang dinakpan nasikop sab niadtong tuig 2029 tungod sa kasong syndicated estafa didto sa Butuan City human kini maoy gitudlong leader ug founder sa Forex Rice Trading Group.

Nakasohan sab kini og Illegal Practice of Medicine sa iloilo City niadtong 2023.

Tungod sa pagkasikop sa suspek, duna pay ubang mga nabiktima niini dinhi ang matud pa niduol sa NBI nga parehas og reklamo nga andam mokiha kaniya.

Ang dinakpan kusganong mihimakak sa pasangil ug miinsister nga wala niya giilad ang biktima kay wala siya magpaila nga lisensiyado siyang doktor apan siya usa ka aesthetician nga maoy iyang gibaligya nga serbisyo.

Nakuha gikan sa suspek ang nagkalain-laing mga syringes ug mga klase-klaseng medisina ug uban pa. – IBM BANAT NEWS