CEBU, Philippines — Patay ang usa ka tomboy nga manindahay og prutas human kini gipusil kagahapon sa kaadlawon diha sa M.C Briones Street, Barangay Ermita, siyudad sa Sugbo.
Ang nakalas mao si Maricel Sialono Patabag alyas Janice ug Jano, 36, residente sa Barangay Duangan, Lungsod sa Pinamungajan.
Samtang ang mga mamumuno tulo ka mga tawong sakay og usa ka motorsiklo nga scooter.
Gisusi na ni Police Major Philip Libres, hepe sa Carbon Police Station 5 sa Cebu City Police Office ang mga CCTV sa lugar sa wala pa ug human nahitabo ang pagpamusil.
Sa pakisusi sa kapulisan sa background sa biktima nahibaw-an nila nga nadakpan kini kaniadto sa Waterfront Police Station 3 niadtong Abril 30, 2024 gumikan sa illegal nga drugas ug nakagawas niadtong Hunyo kay nakapiyansa.
"Mao nay atong gikuan ani, wala pa tay (kuan) pero siyempre naa man siya'y record nga nadakpan, so, mag focus ta sa kini nga aspect. After ana personal nga kuan kung wala ba siya'y nakabangi before pero considering nga June 11 pa siya nakagawas unya namaligya siya diha, so dako og tsansa ang iyahang pagkadakop (ang motibo)," matud ni Libres.
Nakakuha sab og impormasyon ang kapulisan nga nakadawat og text message ang biktima nga dili una kini patindahon og prutas.
Nakakuha ang kapulisan og upat ka basiyo sa bala sa kalibre .45 nga armas diha sa crime scene. (BANAT NEWS)