CEBU, Philippines — Gilusad niadtong miaging adlaw ang kasaulogan sa Mandaue Business Month 2024 sa mga sakop sa Mandaue Chamber of Commerce and Industry.
Ang kalihukan gipahigayon sa Waterworld Resort nga gitambongan sa mga magpapatigayon ug mga opisyal sa kagamhanan sa dakbayan nga gipanguluhan ni Mandaue City Mayor Jonas Cortes ug City Treasurer Atty. Regal Oliva.
Lakip nga nipadayag og suporta sa sektor sa mga negosyante ang mga city councilors nga sila si Maline Cortes-Zafra, Cynthia Cinco-Remedio, ug Jimmy Lumapas.
Suportado ni Mayor Jonas Cortes ang mga programa sa Mandaue Chamber of Commerce and Industry (MCCI) tungod sa ilang dakong tabang sa kalamboan sa ekonomiya.
Ang kagamhanan sa Mandaue City ug ang hugpong sa mga negosyante pinaagi sa MCCI nagkahiusa alang sa kalamboan tumong sa tinguha nga “Move Mandaue”.
Si MCCI President Mark Anthony Ynoc nag-awhag sa publiko sa pag-pahimulos sa mga serbisyo nga gidalit gikan sa business sector kabahin sa ilang pagsaulog sa Mandaue Business Month.
Ang tagduma sa kalihokan sa Mandaue Business Month nagpasalamat sa kagamhanan sa Mandaue City sa hugot usab niini nga pagsuporta ngadto kanila. (BANAT NEWS)