CEBU, Philippines — Nipirma ang Department of Health (DOH) og Joint Administrative Order (JAO) uban sa nagkalain-laing ahensya sa gobyerno aron sa pagpalambo ug pagpanalipod sa panglawas sa mga Persons Deprived of Liberty (PDLs).
Ang gipirmahang polisiya mao ang "National Policy on the Promotion and Protection of Health in Jails, Prisons, Custodial Facilities, and Other Places of Detention".
Si DOH Secretary Teodoro J. Herbosa nagkanayon nga ang Pilipinas komitado sa pagpanalipod sa katungod sa panglawas sa mga piniriso nga walay diskriminasyon.
Busa, matud niya nga ang epektibong pagtinabangay sa mga sektor sa panglawas, seguridad, hustisya, ug lokal nga gobyerno mahinungdanon aron mapanalipdan sila lakip usab ang mga kawani sa bilangguan, ug publiko gikan sa mga peligro sa panglawas.
Kini nga paningkamot nagpasiugda sa mga hagit sa panglawas nga giatubang sa Persons Deprived of Liberty (PDLs) kun mga piniriso sama sa mga congested detention facility nga nagladlad sa mga PDL sa lain-laing mga makatakod nga sakit ug mental health condition.
Gihisgutan usab sa polisiya kung giunsa pagtubag sa lainlaing mga ahensya sa gobyerno ang mga hagit sa kahimsog samtang gisiguro ang tawhanon nga pagtipig sa mga awtoridad sa detensyon.
Sa kinatibuk-an, nahiuyon kini sa duha sa 8-Point Action Agenda sa departamento nga mao ang "Bawat Pilipino, ramdam ang kalusugan ug Pag-iwas sa Sakit", nga parehong nagtumong sa pagsiguro sa palibot nga nagpasiugda ug nanalipod sa panglawas ug accessible nga serbisyo alang sa healthcare.
Ang maong inisyatiba gitambongan ug gisuportahan sa Department of Interior and Local Government (DILG), Department of Justice (DOJ), Philippine Health Insurance Corporation (PhilHealth), Bureau of Corrections (BuCor), Bureau of Jail Management and Penology (BJMP), ug International Committee of the Red Cross (ICRC).