CEBU, Philippines — Usa na karon ka nasudnong balaod ang New Government Procurement Bill nga gipangamahan ni Kongresista Pablo John “PJ” Garcia sa ikatulong distrito sa Probinsiya sa Sugbo.
Ang maong lagda gitawag na karon nga New Government Procurement Act (RA 12009) o NGPA human kini pirmahe ni Presidente Ferdinand “Bongbong” Marcos, Jr..
Sa moang balaod, gawas nga mapaspasan ang proseso sa pagpalit og mga gamit o pagpatuman sa mga proyekto sa gobiyerno, tumong sab niini nga mapilian ang 'Most Economically Advantageous Responsive Bid' o ang supplier labing kwalipikado og produkto o serbisyo nga mahatag ngadto sa gobiyerno ug dili lang tungod kay mao kini ang “lowest bidder” o kinabaratohan sa mga papilian.
Ang procurement sa gobiyerno mao ang proseso sa gobiyerno pagkuha o pagpalit og serbisyo o produkto gikan sa mga kompaniya o “bidders” nga niapil sa bidding.
Kasagaran iagi sa “bidding” mao ang pagpalit og suplay sa nagkadaiyang buhatan sa gobiyerno, pagpalit og mga sakyanan sama sa ambulansiya, truck, ug uban pa.
Niadtong Disyembre 12, 2023 unang naaprobahan sa balay balaoran ang House Bill No. 9648.
Laing balaod nga gipirmahan ni Marcos mao ang Anti-Financial Account Scamming Act (AFASA) niadtong Sabado, Hulyo 20, 2024.
Tumong sa maong balaod ang pakigbatok sa online scamming pinaagi sa pagmando sa mga financial institutions nga panalipdan ang mga account sa mga Pilipino, pagtino ug pagsilot sa money muling, social engineering, ug uban pang mga krimen sa pinansiyal.
Gitugotan usab niini ang Bangko Sentral ng Pilipinas (BSP) sa pag-imbestigar sa mga kadudahang account diin hingpit nga gisuportahan ni BSP Governor Eli Remolona, Jr. ang bag-ong balaod sa anti-financial scamming diin makapauswag kini sa proteksiyon sa mga konsumidor ug makatukod og pagsalig sa sestema sa panalapi sa Pilipinas. (BANAT NEWS)