CEBU, Philippines — Paimbestigahan sa Cebu City council ang matud pa iregularidad sa pagpanghatag sa financial assistance sa mga senior citizen sa dakbayan, subay kini sa pipila ka mga "unclaimed stubs” sa mga benepisaryo.
Sa privilege speech ni Konsehal Pastor "Jun" Alcover, Chairman of the Committee on Senior Citizens, iyang gibutyag nga usa ka senior citizen nga si Euphemio Laurente ang midangop sa iyang opisina ug nagpakitabang kabahin sa giingong iregularidad sa pagpanghatag sa financial assistance.
Matud ni Alcover ang reklamo mahitungod sa financial assistance na P5,000 alang sa mga 80 anyos o mga Octogenarian nga nalatid sa Cebu City Ordinance 2631.
“To date, Mr. Chair, daghan kaayong mga seniors nga nag edad og 80 ug 90 nga wa makakuha sa ilang financial assistance,” matud ni Alcover.
Misaysay si Alcover, nga base sa record gikan sa Office of the Seniors Citizens Affairs (OSCA) pipila sa mga financial assistance ang gimarkahan og "unclaimed."
Dugang niya, usa sa mga hinungdan sa mga senior citizen mao nga wa sila mahibawo sa schedule sa pagpanghatag.
Matud ni Alcover nga base sa reklamo ni Laurente, miparehistro isip benepisyaryo sa financial assistance niadtong Septiyembre 4, 2023, nahatagan og acknowledgment receipt nga nalakip siya sa "3rd batch" nga nakatagana nga mahatagan karong tuiga.
“Tuod man katong buwan sa Marso, nag follow up si Mr. Laurente kung kanus-a makuha ang iyang financial assistance, gitug-anan siya sa taga OSCA, nga iyang pangan, ilang gibalhin sa second batch distribution nga ilnag gihimo niadtong Disyembre 2023,” matud ni Alcover.
Tungod niini, wa makuha ni Laurente ang alang kaniya nga financial assistance, hinungdan nga gimarkahan kini sa sistema sa OSCA og "unclaimed."
Gipahibaw sab ni Alcover nga mitug-an si Laurente kaniya nga way empleyado gikan sa barangay ang mipahibawo niya nga nalakip siya sa 2nd batch, dili na sa 3rd batch.
Butang nga nakapalibog ni Laurente tungod anaa sa iyang dokumento nga nalakip siya sa 3rd batch. “So 3rd batch man siya, so nagpaabot siya. Ang problema gud nga nag follow up siya para sa 3rd batch..so 8 months na nga gapaabot siya,” matud ni Alcover.
Gipahimug-atan ni Alcover ang saad sa mga pampublikong empleyado nga ipatuman ang pagka propesyonal sa serbisyo ug tagaan og maayong pag-atiman ang mga senior citizen.
“Supposedly kini intawong mga senior citizens na, kinahanglan gyud ni silag mga especial nga care, special nga pagtagd. Mao ng ako ning gituyo sa paghimo karon, aron atong warningan sad atonf mga empleyado nga ang mga senior citizens nga muadto sa ilang opisina, tagdon gyud,” matud ni Alcover. Miisa og motion si Alcover nga magpahigayon og inquiry uban sa Senior Citizen Council subay sa reklamo ni Laurente, nga giaprobahan sa konseho. (BANAT NEWS)