Public wi-fi, overpriced?

CEBU, Philippines — Wala usa giaprobahan sa Cebu City Council ang dul-an sa P4 milyones nga kantidad alang sa pagtaod sa public wi-fi tungod sa kadako maong kantidad.

Apan giaprobahan sa konseho ang corollary motion alang sa pagpahigayon og executive session uban ang mga representante sa  Department of Engineering and Public Works (DEPW), Bid and Awards (BAC), Department of Information and Communications Technology (DICT) ug ang contractor sa maong proyekto.

Kini human sa pag-file og resolution ni Konsehal Jerry Guardo, Chairman of the Committee on Infrastructure nga naghangyo ni acting Cebu City Mayor Raymond Alvin Garcia, sa pagpirma og kasabotan uban ang Trends and Technologies Incorporated alang sa pagtaod og public wi-fi sa pipila ka access points sa dakbayan nga nagkantidad og dul-an P4 milyones.

Apan atol sa bag-ohay lang nga regular session niadtong Hulyo 17, 2024, mipasabot si Councilor Nestor Archival Sr., Minority Floor Leader nga "di pabor" sa dakbayan ang maong proposal.

Matud ni Archival, pipila sa mga butang sama sa UTP CAT 5 nga nagkantidad og P101,000, kung ang dakbayan mopalit og mga kaugalingong unit, magkantidad lang ni og P10,000.  “So this 100 times overpriced,” matud ni Archival.

Matud ni Archival, duna pa'y pipila sa mga ekipo nga posibleng overpriced. Dugang niya, nga ang pag-transport aning mga ekipo mamahimo ra sa kantidad nga P345,000.

“I can move my heavy equipment from here going to Camotes and back it is only P300,000. This one, a very small antenna, put that in the roof then it is 345 (thousand), what is going on here? This is something that is not good for the city,” matud ni Archival.

Ang maong public wi-fi anha itaod sa Plaza Sugbo Grounds ug sa Plaza Independencia, nga matud ni Archival gamay ra nga mga lugar.

Matud ni Guardo, nasubay ang maong resolusyon sa ordinansa kaniadto ni Cebu City South District Representative Edu Rama nga kanhi konsehal sa dakbayan nga naglaraw makahatag og wi-fi sa mga pampublikong lugar.

Dugang niya, ang DICT maoy mangita og internet provider samtang ang dakbayan ang mohatag sa ekipo ug imprastruktura.

Ubos sa kasabotan, aduna kini tulo ka tuig na warranty ug ang paggamit sa internet kay indefinite.

Matud ni Councilor Jocelyn Pesquera, nga mga heritage sites ang Plaza Sugbo ug Plaza Independencia ug di kini mamahimong tukoran lang dayon og imprastrutura.

Nasabotan sa mayorya nga ipahigayon ang executive session sa August 31, 2024. (BANAT NEWS)