CEBU, Philippines — Giduso karon didto sa lokal nga kagamhanan sa Santa Fe sa isla sa Bantayan ang pag-establisar sa labing unang Community College sa lungsod. Usa ka ordinansahon sa LGU ang gituki ug giaprobahan sa mga miyembro sa Sangguniang Panlalawigan alang sa maong katuyoan atol sa regular nga sesyon niini niadtong Hulyo 15.
Ang Municipal Ordinance No. 04-2024 mao ang charter sa Community College sa Santa Fe diin tawagon kini nga Colegio de Santa Fe nga mahimutang sa Barangay Poblacion sa karaan nga municipal building.
Gipaabot nga daghan sa mga batan-on sa lungsod ang makabenepisyo niini ilabina nga ang Santa Fe na lang ang lungsod sa isla sa Bantayan ang walay tunghaan sa kolehiyo.
Ang lungsod sa Bantayan aduna nay Cebu Technological University -Bantayan Extension ug Bantayan School Institute. Samtang sa Madridejos, anaa ang Madridejos Community College. Sumala sa Capitol Information Office, ang Colegio de Santa Fe dili lang motanyag og mga kurso, aduna usab kini vocational training, research sa natural resources conservation ug sustainable development.
Ang maong institusyon mooperate isip corporate entity o usa ka korporasyon diin adunay Board of Trustees nga maoy mangulo sa pagdumala niini lakip na ang Mayor, isip chairperson ug ang college president isip vice chairperson.
Ang ubang miyembro sa BOT gikan sa mga representante sa edukasyon, business o patigayon ug sa komunidad.
Ang maong ordinansahon aprobado na Committee on Higher and Technical Education nga gipangulohan ni bokal Thadeo Jovito Ouano. (BANAT NEWS)