Drayber patay, angkas kritikal sa aksidente sa kadalanan

CEBU, Philippines — Patay ang drayber sa motorsiklo ug kritikal ang angkas niini sa nahitabong aksidente diha sa National Highway, Barangay Poblacion, Lungsod sa Liloan, kagahapon sa kadlawon.

Base sa taho sa Liloan Police Station nga si Edgardo Tambago, hingkod ang panuigon, taga Barangay Muabo, Lungsod sa Tabogon ang nagmaneho sa Yamaha Mio 125  ug angkas niya si Jerwin Belamia, hingkod usab ang panuigon, taga Lungsod sa Dalaguete apan nag-abang sa Barangay Basak, Dakbayan sa Lapu-Lapu.

Si Tambago ug Belamia pulos trabahante sa MEPZA, sa Barangay Basak, Lapu-Lapu City.

Matud ni Police Major Eric Gingoyon, hepe sa Liloan Police Station nga nakainom ug ilimnong makahubog ang mga biktima. Ang asawa ni Tambago nibutyag sa kapolisan nga gikan sa Lungsod sa Carmen ang mga biktima namista.

Padulong na unta sa trabahoan sa Dakbayan sa Lapu-Lapu ang mga biktima ug giingong nagdali-dali aron makauli usab sa ilang giabangang pinuy-anan.

Ug gumikan kay uwan ug basa ang dalan wala makontrolar ni Tambago ang manobela sa motorsiklo ug nalamba kini diha sa karsada.

Bisan og nagsul-ob og helmet ang duha nakaangkon gihapon kini og grabeng kadaot sa ilang ulo ug lawas gumikan sa ka kusog sa impact sa ilang pagkalamba.

Daling niresponde ang emergency rescue team diha sa lugar nga nahitaboan uban sa kapolisan ug gida sa tambalanan sa Dakbayan sa Danao ang mga biktima diin si Tambago gideklara nga patay na nga naabot sa tambalanan. (BANAT NEWS)