CEBU, Philippines — Dili mominos sa 352 ka pamilyang naapektahan sa baha sa Mandaue City ang kasamtangan nga gipahimutang sa Umapad Elementary School human niawas ang Butuanon River adlaw nga Lunes.
Si Mandaue City Mayor Jonas Cortes nisusi sa mga bakwit diha temporary evacuation center sa Umapad Elementary School Gym diin sila gipanghatagan sa City Social Welfare Services og disaster kits, pagkaon ug tubig.
Nasayran gikan ni Felix Suico, pangulo sa CDRRMO sa Mandaue City nga tulo ka mga barangay ang naapektahan sa baha ug kini mao ang Ibabao Estancia, Paknaan ug Barangay Umapad, apan ang naulahi maoy dunay daghang naapektahan.
Sa pikas bahin, kinahanglan mag-amping ang tanan nunot sa namonitor nga Low Pressure Area (LPA) sa Philippine Atmospheric, Geophysical and Astronomical Services Administration (PAGASA) sa silangang bahin sa Mindanao kagahapon, Hulyo 16, 2024.
Nasigpatan 310 km East Northeast sa Davao City. Matud sa PAGASA adunay posibilidad nga mahimo kining bagyo sa mosunod nga mga adlaw.
Sugod karong Miyerkukes, Hulyo 17, 2024, magdala kini og madag-umon nga kalangitan inubanan sa kasarangan ngadto sa kusog nga pag-ulan, panugdog ug kilat sa Eastern ug Central Visayas ug pipila ka bahin sa Mindanao nga posibleng hinungdan sa pagbaha o pagdahili sa yuta sa mga lugar. —Rowena Capistrano ug Gie-Ann N. Tapic/IBM BANAT NEWS