Internet shop sa Barangay Kamagayan gikawatan

CEBU, Philippines — Usa ka Internet shop diha sa dalan Sanciangko, Barangay Kamagayan, siyudad sa Sugbo ang gikawatan kagahapon sa kadlawon.

Sa kuha sa CCTV sa maong internet shop makita ang lalake nga yano ra kaayong nangibot sa mga wire sa CPU sa computer.

Human niya maibot ang mga wires gialsa dayon kini sa suspect dayong gawas sa internet shop, ninaog sa hagdanan dayong sibat bitbit na ang CPU nga nagkantidad og P42,000.

Matud ni alyas France, usa sa mga trabahante sa internet shop nga gikan siya sa tambalanan kay gipa check-up iyang inahan ug pag-abot niya sa trabahoan nilingkod siya sa hagdanan.

Gitan-aw niya iyahang mga kauban sa trabaho nga pulos nanglimpyo ug nagluya.

Dunay usa ka customer nga human nagduwa ni out kini og alas 4:52 sa kadlawon.

Apan mibalik kini ug didto na gikuha ang CPU, nagduha-duha og lihok si alyas France kay giingong may-ong kini sa iyang kauban sa trabaho.

Dihang iyang gisusi didto niya nasuta nga wala'y tattoo sa iyahang mga kauban ug sa iyang pagpangutana kun duna ba silay kauban sa trabaho nga nagkuha og CPU niingon ang mga katrabaho niini nga wala.

Didto na gigukod ni alyas France ang nagkuha sa CPU, ginaog niya apan wala na niya naabtan ang suspect, nagduda sila nga dunay kakunsabo ang suspetsado nga nag motorsiklo ug nagpaabot kaniya.

Ang Parian Police Station sa ilang bahin nihimo og follow up operation labot sa maong hitabo.— MEL BANAT NEWS