CEBU, Philippines — Tungod sa nasinating kusog nga pagbunok sa uwan nangaluka ang mga punoan sa kahoy sa kabukiran ug nadala sa pagdahili yuta paubos padung sa karsada diha sa Sitio Tawagan, sa Barangay Sirao ning Dakbayan sa Sugbo, kagahapon Lunes sa udto.
Si Konsehal Epitacio Gabunado, ang Chairman sa Peace and Order sa barangay mibutyag nga kusog kaayo ang ulan sa ilang dapit anang mga taknaa nga nilanat og duha ka oras.
Ang mga dagkong kahoy gikan sa babaw sa maong dapit nangatumba ug nauban sa pagdahili sa yuta, lapuk ug mga bato nga adto nahan-ok sa kadalanan sa ubos.
Wala ra hinuoy tawo o kabalayan nga naigo. Hinuon adunay upat ka panimalay nga naa sa duol nga susihon pa kun luwas pa ba ang ilang dapit atol ning pagsuwat sa balita.
Ang maong dalan napuno sa lapok, mga bato ug punoan sa kahoy gitabangan sa paghawan sa mga tawo ug barangay responders aron maagian og balik.
Hangtud ning pagsulat sa balita mga motor pala ang makaagi sa natabunan nga dalan. Ang nidahili nga dapit duol lamang sa sikat nga Sirao flower farm nga usa na ka tourist destination sa siyudad. (CEBU NEWS)