CEBU, Philippines — Nasakmit sa kapolisan ang tunga sa kilong shabu nga nagkantidad og P3. 4 milyones gikan sa 45 anyos nga High Value Individual (HVI) nga pusher nga taga Barangay Carreta sa Siyudad sa Sugbo.
Nadakpan kini sa buy bust operation alas-10 pasado ang takna sa miaging Sabado sa gabii sa Sitio Little Tokyo sa Barangay Maguikay sa Siyudad sa Mandaue.
Si Police Lieutenant Colonel Wilfredo Alarcon, hepe sa City Intelligence Unit (CIU) sa Mandaue City Police Office (MCPO) maoy nangulo sa buy bust operasyon base sa ilang impormasyon nga ang maong dinakpan maoy tigtagak og shabu sa Siyudad sa Mandaue.
Samtang moabot sa kapin P400 mil nga balor sa gituohang shabu ang nasakmit sa mga operatiba sa Labangon Police Station sa Cebu City Police Office (CCPO) sa ilang operasyon sa Barangay Labangon, siyudad sa Sugbo, Biyernes sa gabii.
Ang operasyon gihimo diha sa A. Lopez Street, Barangay Labangon nga niresulta sa pagkasikop kang Rowegie Navarro alyas Dudung, 23, taga Sitio Mahayahay 1, Barangay Calamba ning siyudad nga usa ka high value individual.
Nakuhaan kini og 60.2 gramo nga gituohang shabu nga nagkantidad og P409,000.
Duha ka semana nga gi monitor ang suspetsado human nakadawat og impormasyon ang kapulisan nga nalambigit kini sa illegal nga kalihukan. Dili lang sa Labangon kini nagbaligya og drugas.—Romeo Limpangog, Rowena Capistrano, Rowena D. Capistrano, Decemay P. Padilla ug Romeo D. Marantal/IBM BANAT NEWS