Drayber sa taksi gireklamong nilugos sa pasahero

CEBU, Philippines — Hugtanong gihimakak sa 44 anyos nga taxi driver nga iyahang gilugos iyahang 26-anyos nga babaye nga iyahang pahasero ug trabahante sa usa ka Business Process Outsourcing (BPO) company niadtong miaging adlaw.

Ang 26-anyos nga biktima nga taga Barangay Duljo-Fatima gikatahong nahubog human nag-inom sa usa ka bar sa may Pelaez Street nisakay kini sa taksi sa suspek ug nagpahatod sa ilang panimalay apan nakatulog matud pa kini sulod sa taxi.

Nakurat nalang siya nga gipukaw siya sa taxi driver nga wala na siya’t sapot diin ang iyang mga sinina lakip ang iyang underwear naa na sa iyang kilid.

Sa dihang iyang gipangutana ang driver unsay nahitabo giingnan lang matod pa siya sa suspek nga dili mabalaka kay “wala gipasulod.”

Mibangon dayon kini ug natingala nalang nga naa na siya sulod sa usa ka motel diha sa North Reclamation Area, dakbayan sa Sugbo.

Gumikan sa hitabo dali nga nireklamo ang biktima sa Mabolo Police Station. Ang suspek nadakpan diha sa opisina sa taxi company nga nahimutang sa Barangay Tabunok, dakbayan sa Talisay.

Apan ang taxi driver sa iyang bahin mihimakak nga gihilabtan niya ang biktima. Siya miesplikar nga sa dihang naabot na sila sa Duljo-Fatima ang babaye miingon nga dili didto ilahang balay, tungod sa iyang kalibog gidala niya kini sa motel aron makapahuway apan wala niya kini hilabti.

Kasong kalapasan sa Article 266-A sa Revised Penal Code nga gi amender sa Republic Act 8353 kun Anti-Rape Law ang ipasaka batok sa suspetsado. --  IBM BANAT NEWS