CEBU, Philippines — Pakigtagboan ni Acting Cebu City Mayor Raymond Alvin Garcia ang technical working committee aron mahatagan og katin-awan ang gikataho nga kuwangan og 2-meters ang sukod sa track oval diha sa Cebu City Sports Center.
Matud ni Garcia nga premature pa nga mosulti og substandard ang track oval hangtud kompirmado na kini gikan sa mga eksperto.
Susama usab niini ang gipadayag sa Department of Education kalabot sa maong isyu.
Base sa taho giingong wala mahasubay sa standard nga 400 meter loop ang track oval diin 388 meter loop lang kini nga dili aprobado sa World Athletics.
Gikatakdang tubagon sa focal person sa technical working committee ang isyu diin masayran ang detalye mahitungod sa isyu sa track oval.
Gipadayag sa LGU ug DepEd nga nagamit ang track oval sa Cebu City Sports Center niadtong Palarong Pambansa 1994.
Matud usab ni Garcia nga kinahanglang masulbad dayon ang isyu alang sa hapsay nga pagpadayon sa Palarong Pambansa 2024.
Si Dr. Adolf Aguilar, Department of Education (DepEd) Cebu City assistant superintendent nagkanayon nga ang oval nga gigamit karon mao usab ang gigamit sa Palaraong Pambansa 1994 hinungdan nga magpaabot sila sa pakisusi nga himuon sa technical consultant. (BDB) BANAT NEWS