CEBU, Philippines — Ubay-ubay nga armas sa nagkadaiyang kalibre ang nasakmit atol sa mga operasyon sa Danao City Police Station batok sa ilegal nga armas ug implementasyon sa Oplan Katok o paghangyo nga i-surrender ang armas nga expired ang lisensiya.
Gawas sa mga armas apil sa nasakmit ang mga ekipo ug mga materiyales sa paggama og nga pistola. Gipang-display kini sa niaging adlaw ug gipakita sa katawhan dihang gilusad nila ang ilang programa nga gitawag og Project Trident.
Tumong sa paglusad sa Project Trident nga masulbad ang ilegal nga paghimo og armas sa lugar.
Ang Project Trident gilangkuban sa community involvement diin ang kabarangayan mohingusog sa information campaign paghangyo sa mga mamuhatay og armas nga i-surrender ilang kagamitan ug materiyales.
Ikaduha mao ang paghatag og panginabuhian sa mga manghimoay og armas diin 120 na kanila ang nahatagan og trabaho sa city hall aron maundang ang illegal gun manufacturing.
Ikatulong aspeto sa programa mao ang padayong paghinguspg sa pagpanakop sa manghimoay og paltik ug pagkompiska niini.
Matud ni Police Lieutenant Colonel Clark Ike Arriola nga usa usab kini ka pamaagi aron dili magamit ang mga paltik nga armas sa umaabot nga eleksiyon. BDB BANAT NEWS